قــــطـــاع الـتــشــيـيـد ومــــواد الــبــنـــاء (الــجـــوهـــره)

بسم الله الرحمن الرحيم
اعتقد من استطلاع الرأى كده هناك طلب على سهم الجوهره لانى اتسئلت عنه اكتر من مره وعموما لو فيه وقت نبقى نتكلم عن اكرو مصر او الليفت سلاب ومعاهم جنوب الوادى
عموما سهم الجوهره من الاسهم الغنيه بالنماذج وعندنا نقطه فنيه عايزين نوضحها للناس لانها  من وجهه نظرى مفيده فى عمليه الدخول والمتاجره وعشان تعرف لما تدخل حتدخل على ايه ولما تخرج حتخرج على ايه لاننا عندنا  اكتر من نقطه دخول واكتر من نقطه خروج بدايه كده عندنا نموذج هارمونيك خفاش تبادلى هابط نقطه اكتماله ايجابيه يكتمل فى نطاق 3.59-3.67 والنموذج ده  مش حيكون صحيح الا بالوصول الى مستوى 3.29 وهو الحد الادنى للحكم بصحه النموذج ولا يتعدى مستوى 3.67 وبعد 3.29 حنكون حذرين فى التعامل مع السهم لانه مرشح فى اى وقت ان يبدء التراجع  وكالعاده بكرر ناخد بالنا وقتها من الانفراج او الشموع الانعكاسيه
لما نتكلم عن نقاط الدخول وهنا حنبدء الشغل التقيل ممكن لو انا بقوم بتحليل السهم اشوف نموذج واحد من النماذج اللى انا راسمها وابنى قرار على هذا الاساس ويحصل اذ فجأه ان السهم يتكعبل بسرعه والسبب انى ممكن اكون دخلت على نموذج معين اتاجر لكن ما اخدتش بالى مثلا ان فيه مقاومه قريبه منى او ترند قافل على السهم  الصعود عشان كده اى محلل عينيه كويسه على الشارت وعرف يقرء النماذج المهمه  الموجوده حيكون عندنا حاجه من اتنين اما ان دمج النماذج مع بعض اقدر استخلص منه نقاط دخول او خروج تتناسب مع طبيعه المستثمر سواء كان مضارب او مستثمر متوسط الاجل او مستثمر طويل الاجل او البديل التانى انى انتخب مستويات معينه للدخول ويحصل نوع من الموائمه بين القواعد الفنيه النظريه وبين التطبيق العملى زى المثال اللى عندنا الان
على الشارت فيه نموذج هارمونيك ونموذجين كلاسيك معكوس رأس وكتفين اكتافه على شكل قيعان دائريه وعندنا معكوس البامب اند رن والحقيقه ان كل نموذج منهم ينفع انه يدرس فى تحليل لوحده لكن فكره انى اجمع بين هذه النماذج فى شارت واحد ونعرف نختار افضل النقاط دخولا وخروجا هى فكره التحليل بتاعتى للسهم ومش مهم عندى كعادتى فى التحليل ان السهم يوصل لمستهدفه او لا فالتباهى بدقه التوقع وتحقيق المستهدف اعتبرها مرحله مراهقه فنيه تجاوزها الزمن فالمهم عندى  والاشمل هو تعلم بعض النقاط الفنيه اللى ممكن انها تفيد فى عمليه المتاجره والى حد ما تكون امنه
لو بصينا كده على الشارت حنلاقى ان المضارب حيدخل عند  مستوى 2 جنيه بالظيط اعلى اغلاق شمعه 28/12/2011 والدخول هنا فنى مش اعتباط يعنى كان دخول على كتف ايمن لمعكوس الرأس والكتفين ودخول على نموذج هارمونيك  فى طور التكوين
النقطه التانيه للدخول هى مستوى 2.50 ودى المتاجره المشهوره اللى دايما بتكلم عنها مع نماذج الهارمونيك  وهنا المتاجره حدودها ما بين 2.50 وحتى 3.67 كحد اقصى ( ممكن نعتبرها كمان دخول على اكتمال قاع مزدوج) ونقطه الدخول التالته هى منطقه 2.25-2.30 بعد اختراق خط الترند الهابط لنموذج البامب اند رن والنفطه الرابعه للدخول هى مستوى 2.20 تقريبا على اكتمال معكوس الرأس والكتفين .... تخيلوا ان ال4 نقاط للدخول صحيحه تماما نظريا ولا غبار عليها لكن يا ترى مين اللى حيقدر يخاطر ويدخل عند قاع 2 جنيه لتريده حتى 2.20-2.25 لو اخد باله من خد الترند الهابط وخط التأكيد لنموذج معكوس الرأس والكتفين؟ ده شغل المضاربين المحترفين ازاى يدخل فى تريده اقل تقدير لها حتعمل حوالى 10% من  سعر السهم يا ترى كان ده مكسب وحش فى ظل الظروف السابقه اعتقد مش بطال
النقطه الثانيه كافضل نقاط الدخول هى 2.25 تقريبا بعد اختراق خط الترند الهابط لمستهدف يصل الى 3.50 وثالث النقاط ترتيبا هى مستوى 2.50 الاكثر امنا
الترتيب بالشكل ده هو ترتيب الى حد كبير عاطفى يناسب طبيعتى الشخصيه الغير محبه للانتظار الطويل فى الاسهم او الدخول الامن فيها لكن حقيقه افضل النقاط فنيا من الناحيه النظريه هى نقطه الدخول عند 2.50 بالرغم من ضياع فرصه ربح  تقدر ب25% من سعر السهم والحق يقال انها نسبه مرتفعه جدا لتركها تضيع الا انها فنيا مؤكده بالتلاته
هذه النقطه هى نقطه دخول لمتاجره  BAMM على نموذج الهارمونيك وهى نفسها نقطه اكتمال قاع مزدوج واخيرا من الممكن اعتبارها نقطه تأكيد لصحه اختراق البامب اند رن فيما يعرف RESISTANCE BREAK و كنوع من الموائمه بين النظريه والواقع السياسى المصرى يا ترى فى ظل الظروف السابقه من عدم استقرار سياسى  وكل كام يوم عندنا مذابح امثال محمد محمود ومجلس الوزراء والمواقف الداخليه والخارجيه من تصدر التيار الاسلامى المكتسح (ال يعنى ماكنوش عارفين والاستفتاء خير دليل) كان كام واحد ممكن ياخد قرار انه يدخل عند قاع 2 جنيه  اعتقد انها القله القليله التى تسبح عكس التيار والتى تصنع ثراوتها فى الازمات   لكن فى بعض المواقف نحتاج الى الموائمه الفعليه بين ان تتمتع طول الوقت بالمجازفه وبين ان تنتظر للمتاجره بامان اعتقد ان الموضوع يرجع الى طبيعه كل مستثمر وقدرته على اتخاذ القرار واختيار ما يناسب امكانياته وكل ظرف يقدر بقدره وحسابات العائد والمخاطره  وهى العامل الثانى الذى يحكم قرارت البيع والشراء لها اليد العليا فى مثل هذه المواقف والنسبه المتعارف عليها بين العائد والمخاطره هى  1 : 2.5  اى كل جنيه  اخاطر به للحصول على عائد قدره 2.5 جنيه
اخير نقطه الخروج من السهم حتى هذه اللحظه هى الاغلاق ادنى مستوى 2.50 للمضارب و1.90 للمستثمر متوسط وطويل الاجل